[DE - EN - ES - FR - IT - LA - PT]

Prot. N. 40/21

DECRETUM
De celebrationibus sancti Gregorii Narecensis, abbatis et Ecclesiæ doctoris,
 sancti Ioannis De Avila, presbyteri et Ecclesiæ doctoris,
et sanctæ Hildegardis Bingensis, virginis et Ecclesiæ doctoris,
in Calendario Romano generali inscribendis

Sanctitas cum intellectu coniungitur, qui experientia de Iesu Christi mysterio est, indissolubili nexu Ecclesiæ mysterio iuncto. Hoc vinculum inter sanctitatem et intellectum divinarum rerum humanarumque insimul, peculiari modo refulget in iis qui titulo “doctoris Ecclesiæ” exornati sunt. Nam sapientia, quæ horum virorum harumque mulierum propria est, non ad eos ac eas tantum attinet, quia dum discipuli divinæ Sapientiæ fiunt, magistri item sapientiæ pro cuncta ecclesiali communitate facti sunt. Sub hac luce sancti et sanctæ “doctores” in Calendario Romano generali inscribuntur.

Quapropter, recentibus declarationibus tituli doctoris Ecclesiæ perpensis, qui sanctis magni momenti Occidentis ac Orientis tributus est, Summus Pontifex FRANCISCUS in Calendarium Romanum generale inseri decrevit subsequentes celebrationes, gradu memoriæ ad libitum:

sancti Gregorii Narecensis, abbatis et Ecclesiæ doctoris, die 27 mensis Februarii,

sancti Ioannis De Avila, presbyteri et Ecclesiæ doctoris, die 10 mensis Maii,

sanctæ Hildegardis Bingensis, virginis et Ecclesiæ doctoris, die 17 mensis Septembris.

Novæ igitur memoriæ cunctis Calendariis Librisque liturgicis pro Missæ et Liturgiæ Horarum celebratione erunt inserendæ; textus liturgici adhibendi hoc decreto adnexi, cura Cœtuum Episcoporum vertendi, approbandi et post huius Dicasterii confirmationem edendi sunt.  

Contrariis quibuslibet minime obstantibus.

Ex ædibus Congregationis de Cultu Divino et Disciplina Sacramentorum, die 25 mensis ianuarii 2021, in festo Conversionis S. Pauli, apostoli.

Robertus Card. Sarah
Præfectus

✠  Arturus Roche
Archiepiscopus a Secretis