|
|
|
|
|
|
|||
|
|||
|
LATINITAS COMMENTARII "LATINITAS" ANNO MMIV FESTVS LATINITATIS DIES CERTAMEN VATICANVM XXXXVI SCRIPTA IN CERTAMINE VATICANO PRAEMIO HONESTATA DE RE HISTORICA DE RE CHRISTIANA ACTA AETATIS NOSTRAE LATINITATIS SPECIMINA EPISTVLARE COMMERCIVM Certamen Vaticanum XXXXVII indicitur LIBRORVM EXISTIMATIONES INDEX COMMENTATIONVM ANNO MMIII EDITARVM Errata Corrige
LIBELLVS II LITTERAE GRAECAE SCRIPTA IN CERTAMINE VATICANO PRAEMIO HONESTATA LATINITATIS SPECIMINA LATINITAS HVMANISTARVM DE RE HISTORICA VARIA Bologna H.A., Diarium Latinum EPISTVLARVM COMMERCIVM LIBRORVM EXISTIMATIONES LIBELLVS III LITTERAE GRAECAE SCRIPTA IN CERTAMINE VATICANO PRAEMIO HONESTATA LATINITATIS SPECIMINA DE RE HISTORICA ACTA AETATIS NOSTRAE VARIA Bologna H.A., Diarium Latinum LIBRORVM EXISTIMATIONES Errata corrige
LIBELLVS IV SCRIPTA IN CERTAMINE VATICANO PRAEMIO HONESTATA LATINITATIS SPECIMINA DE RE CHRISTIANA VARIA MIRABILIA QVAEDAM AETATIS NOSTRAE ACTA EPISTVLARE COMMERCIVM LIBRORVM EXISTIMATIONES Gonzalo Sánchez-Molero J.L., La "Librería rica" de Felipe II. Estudio histórico y catalogación. Instituto Escurialense de Investigaciones Históricas y Artísticas, Ediciones Escurialenses, 1998, pp. 879 (Amigo A.M.) - Fr. Luisii Legionensis Opera, Series secunda: Vol. III Quaestiones variae, IX Reportata theologica, X In Epistolam ad Romanos expositio. Editionem curaverunt Rodríguez Díez I. et Díaz García G., Salmanticae annis 1991-1995, Editiones Escurialenses (Amigo A.M.) - Schleiermacher F., Sobre los diferentes métodos de traducir, ed. bilingüe (alemana-española): versión, introducción y comentario por V. García Yerba, Gredos, Madrid 2000 (Amigo A.M.) - Augustinus, De Civitate Dei contra paganos libri viginti duo, translated with introduction and notes by Youm Seong, voll. 1-3, Benedict Press, Waegwan, Korea 2004 (Turek V.)
Mensibus: Martio, Aprili, Maio BARBARI LYCEA VASTANT Aetatis nostrae adulescentibus facultas datur magna cum opportunitate sibi comparandi scientiam eruditionemque. Non desunt tamen discipuli vel tirones quibus intemperantia, eversio, saevitia et feritas cordi sint, quique non vereantur lycea aliaque eiusmodi generis instituta ferro ignique vastare, professores adoriri, supellectilem exscindere, aedificia ex integro evertere. Scelesti isti magna cum adrogantia et insolentia frequentant clarissimum lyceum, quod classicum dicitur. Qui quidem adulescentes, honesto loco nati, tam rudes, tam feros ac barbaros se praebent, ut asperitate non solum Gallos, quos Brennus ad Italiam populandam Romamque delendam duxit, verum et Cimbros et Teutones, quos Marius et Catulus consules devicerunt, longe praecellant. Ipsi quidem, quibus parentes, ne molestia afficiantur nihil umquam denegant, omnia sibi permittenda putant. Romanum lyceum, Iulio Caesari dicatum, Italicorum omnium est maximum et clarissimum: multi viri ibi optima scientia sunt instructi, atque deinde amplam nominis gloriam sunt adepti. Tamen, fere quotannis, lyceum illud a novis barbaris vastatur: tempore constituto a discipulis administratur. Parvus stultorum grex professores turpibus verbis obiurgat, praesidem obsidet, tabulas frangit, mensas scriptorias delet, parietes obscenis figuris turpibusque verbis contaminat. Etiam officinas rei chemicae physicaeque experiendae, optimis recentissimis instrumentis instructas, evertit. Horatius Antonius Bologna
INCOGNITA ET NIGRA VIS VNIVERSI DOMINATRIX PVTATVR Homines, cum in caelos oculos vertant, omnia immota atque immutata cernunt, quamvis compertum habeant sidera et viam lacteam non eadem semper fuisse nec in eodem loco semper exstare: nam obscura et incognita vis, quam Americani vestigatores dark energy id est nigram vim nuncupant, mundum longe lateque sine fine extendit, galaxias demovet, totiusque universi una et sola dominatrix videtur. Accuratissimae investigationes superiore anno factae comprobaverunt hanc vim re vera exstare. Nunc vero cognoscere volunt periti viri quid sit eiusmodi nigra vis et quid de mundi origine patefacere possit. Duo Americani vestigatores, accuratis studiis de mundi origine perfectis, statuerunt per nigram et obscuram vim multa declarari posse. Auxilio ingentis telescopii, quod Wilkinson Microwave Anisotropy Probe titulo est notum, illam universi radiationem, quae ex minutissimis undis constat, funditus exploraverunt, atque Universi aetatem quadam cum veri similitudine describere potuerunt. Ipsi praeterea decreverunt res in mundo constare quaternas centesimas ex materia communi, vicenas ternas ex materia frigida et obscura, et ad septuagenas ternas ex nigra vi. Horatius Antonius Bologna
AEGYPTII ANTIQVA MACOMETI MEDICAMENTA ADHIBENT Nonnullis de causis, hac aetate, antiqua medicamenta et remedia repudiantur, quoniam medici, qui magnam reponunt fiduciam in chemicis inventis, indoctos vel saltem rudes ducunt antiquos valetudinis curatores utpote qui artem chemicam eiusque praecipuas proprietates ignorarent. Quod sane falsum. Nam inde a remotissimis temporibus homines, cum in silvis habitarent animaliumque mores sequerentur, illa contra morbos remedia adhibebant, quae herbae praesertim et arbores suppeditabant: medicina ergo apud antiquas gentes herbarum scientia fuit: perperam, plerumque, antiqua remedia spernuntur vel damnantur. Apud Aegyptios, illa scilicet in natione in qua medicorum ars ad summum pervenit fastigium, ab antiquissimis temporibus invaluit naturalis medicina. Ineunte mense Decembri proximo praeterito, puer Aegyptius, cui nomen Saiph, septimum agens annum, cerebri paralysi afficiebatur. Cum remedia chemica adhibita nullum adiumentum praeberent, mater eius ad antiqua remedia, vetita quidem sed a Macometo quoque olim sumpta, recurrit. Paucos post dies, puer e longa gravique valetudine se colligere coepit, remissior et efficientior factus est, nec amplius laboravit ex aerumnosis impetibus. Antiqua cura, apud Arabes hejama nuncupata, hoc modo fit: medicus, ut aera ex aegroti corpore tollat, per cucurbitulas sanguinem in unum locum contrahit: tunc, nonnullis sectionibus factis, sanguinem superfluentem exstrahit e membris. Remedium, quod sanguinis detractio nuncupatur, invaluisse putatur iam Pharaonum aetate, eodemque adhuc nonnulli Italiae Mediae medici utuntur. Horatius Antonius Bologna Mensibus: Iulio, Augusto, Septembri
MVLIER PALAESTINENSIS ISRAELITAS LANIAT Compertum habemus omnium animalium hominem ferocissimum esse. Quantas et quam multas caedes patret, neminem latet. Cotidie fere insidias novas homines lugent. Palaestinenses et Israelitae, gentium iuribus obtemperantes, eandem regionem sunt incolere coacti. Continuis bellis de agrorum pagorumque possessione inter se contendunt. Fortiores videntur Israelitae, quibus auxilio sunt eiusdem stirpis divites terrarum orbem incolentes. Quare Palaestinenses ad Israelitas lacessendos novum inusitatumque belli genus invenerunt. Omnibus fere diebus, magna displosivi copia sub vestibus abdita, vel in thermopoliis vel in autocinetis publicis vel in mercatibus Israelitarum caedem faciunt. Vitam ipsi displosione amittunt at patriae libertatisque martyres habentur. Mulier Palaestinensis, XXIII annum agens, coacta est a marito, ut crudele inhumanumque facinus ederet: die dicta, quamvis invita, ipsa mulier est ad insidias patrandas missa. Ubi ad hostium stationem pervenit, pulverem pyrium, quem sub vestes abdiderat, sine cunctatione incendit. Displosio quattuor hostium milites laniavit. Palaestinenses mulierem libertatis martyrem ducunt: etiam eius maritum iisdem honoribus afficiunt. Aliquot post diebus patefacta est veritas. Maritus, cum comperisset uxorem cum altero viro fidem coniugalem violavisse, ne tanto scelere imbueretur, ipsam ad hostes necandos misit. Quo quidem modo ille uxorem necavit, hostium caedem edidit, sibi nomen comparavit.
PACIFICI IN CIVITATVM VIAS CONCVRRVNT Bellum Iraquianum, cui cum Americanis ad pacem et res restituendas milites quoque Europaei intersunt, territorum Araborum iras et ultiones movet. Vulnus Matritense, adhuc caedium sanguine manans, Europae terrarumque incolas ita territavit, ut die dicta cives humaniores, bellum territoresque damnantes, pacem petituri maximarum urbium vias invaserint. Omnes quotquot pacem concordiamque colunt, longa faciunt agmina et in ampla fora contendunt, ubi partium moderatores et primores orationes habent. Hamaxostichis et automatis magna hominum multitudo e longinquis quoque locis cum liberis et coniugibus in praecipuas urbes convenit. Signo dato, participes una voce a rerum moderatoribus pacem et concordiam petunt, eosdem hortantur, ut innumerabilibus bellis terrarum gentes vexantibus finem faciant. Sed in tanta hominum multitudine sunt qui crimina pacis nomine patrent: nam autocineta incendunt, vitrea tabernarum armaria frangunt, merces auferunt, cum vigilibus et militibus, quibus civium incolumitas commissa est, in angustis urbium viis contendunt, seditiones concitant. Damna et incommoda fere ubicumque facta sunt. Id, ut videtur, pacis nomine factum est: nec eos, qui acriter in hominem invecti erant, piguit vel puduit.
OBSES ITALVS FOEDE NECATVR Bello confecto et Iraquianorum tyranno capto, res publica adhuc externo et civili bello premitur. Magna nationis pars, priori constitutioni etiam nunc favens, in milites Americanos et Anglos, qui tyrannidi delendae operam dederunt, impetus et insidias faciunt. Ad mille milites Americani non in acie sed in pace vitam amiserunt. Res haud facile restituitur, quoniam civitas bello civili laniatur et in multos dividitur petitores, in quibus Curdae, Sunnitae et Sciitae de potentatu acriter contendunt. In tanta rerum perturbatione nonnullae factiones armis et vi terrorem in milites et in cives externos iniciunt. Ad concitationem et discordiam augendam advenas rapiunt quos mercem idoneam vel ad captivos permutandos vel ad ingentem nummum copiam obtinendam ducunt. Inter obsides quattuor Itali fuerunt, qui ad aedificatores operumque conditores tutandos in Iraquiam contenderunt. Territores necopinato a. d. XVI Kal. Maias ferum in modum Fabricium necaverunt. Obses Italus virum strenuum se praebuit: cum enim carnifex tormentum in cervicem intentaret, ille nigram ex oculis fasciam evellit et elata voce: "Vobis ostendo, ait, quo modo mortem obeat Italus". Infandum facinus territores taeniae sonorae infixerunt et per telehorasim evulgaverunt. Quo crimine patrato territores nuntiaverunt se, nisi Italorum copiae Iraquiam relinquerent, deinceps ceteris quoque mortem collaturos. Summus Pontifex, cui omnium salus cordi est, illos homines hortatus est, ut obsides libertate donarent. Quod quidem aliquantum temporis post inexplicabili quodam modo factum est. Horatius Antonius Bologna
|
 |